L'entschatta settember ha la SRG SSR annunzià ch'i stoppia vegnir realisà in program da spargn tar tut las unitads per ils onns 2025 e 2026 pervia d'entradas pli bassas. Quai perche la chareschia na vegn betg gulivada sco previs ed era pervia d’entradas pli bassas tar la reclama. L'onn proxim ston vegnir spargnads totalmain 50 milliuns francs ed en dus onns 65 milliuns francs. Las differentas unitads d'interpresa han communitgà las ultimas emnas lur programs da spargn per l'onn 2025, tut en tut datti ina reducziun da 150 plazzas cumplainas.
Oz a mezdi è vegnì infurmà il persunal tge che quai munta per RTR. L'onn 2025 èsi da spargnar 300'000 francs, il 2026 anc ina giada tant. Quai munta che RTR sto reducir per l'onn proxim 4.3 FTE’s. La reducziun succeda en il program, ma er en tut ils auters secturs sco tar la tecnica, tar il marketing e tar ils servetschs centrals. Tuts èn pertutgads da las mesiras da spargn.
La direcziun realisescha la reducziun da 4.3 FTE’s sur la fluctuaziun natirala. Il SSM beneventa bain ch'i na sto betg vegnir relaschà persunal, ma i resta ina reducziun da plazzas. Cun stritgar formats aifer il program e cun respargns en auters secturs vegnian libras resursas da persunal, dentant fin uss n'èsi betg anc cler en tge dimensiun ch'i dettia spustaments tar ils champs d'incumbensas concrets dals emploiads e da las emploiadas. Il SSM pretenda che quai possia vegnir sclerì uschè svelt sco pussaivel per las singulas persunas.
Enavant deplorescha ilSSM che la direcziun n'ha anc savì dir nagut davart las mesiras da spargn ch'èn avant maun enfin il 2026, cunquai che RTR sto qua anc ina giada spargnar la summa da 300'000 francs.
Suenter l' infurmaziun davart il persunal dad oz, restan anc dumondas avertas ed ils svilups intscherts e futurs fan quitads als emploiads ed a las emploiadas. Il SSM parta quels quitads ed è qua per ses commembers e sias commembras.
Co vai a Tai suenter l'infurmaziun da persunal? Scriva a nus sin ((adressa da SSM))! T‘annunzia era sche ti has anc dumondas avertas suenter l'infurmaziun. Nus sclerin las dumondas per Tai. E sche Ti dovras sustegn, è il SSM qua per Tai.
